Մի քանի ամսում երեք բուքմեյքերական ընկերություններ ուղարկել են շուրջ 45 միլիոն SMS․ Արփինե Հովհաննիսյան

Արդարադատության նախկին նախարար Արփինե Հովհաննիսյանը հրապարակել է ահազանգ՝ նշելով, որ Հայաստանում գործող բուքմեյքերական ընկերությունները զանգվածաբար ուղարկում են գայթակղիչ բովանդակությամբ հաղորդագրություններ այն պայմաններում, երբ դրանց գովազդը օրենքով արգելված է։

Նրա խոսքով՝ ընկերությունները քաղաքացիներին ուղարկել են տեքստեր, որոնցում խոստացվում են բոնուսներ և կանխիկ վերադարձներ։ Օրինակ՝ հաղորդագրություններից մեկում ասվում է․ «Ayo henc duq: staceq 50% bonus virtual sportum… Sharunakir xaghal ev stacir avelin»։

Հովհաննիսյանի փոխանցմամբ՝ երեք խոշոր բուքմեյքերական ընկերություններ մի քանի ամսվա ընթացքում իրենց կայքերում գրանցված ակտիվ և պասիվ օգտատերերին ուղարկել են շուրջ 45 միլիոն հաղորդագրություն, ներառյալ SMS-ներ, էլեկտրոնային նամակներ և այլ ծանուցումներ։ Նրա խոսքով՝ անգամ մեկ անգամ գրանցված օգտատերը շարունակաբար ստանում է նմանատիպ հաղորդագրություններ, ինչը կարող է խոչընդոտել ինքնագիտակցված որոշումների կայացմանը։

Իրավաբանը հարց է բարձրացրել, թե արդյոք նման հաղորդագրությունների ուղարկումը ևս պետք է արգելվի՝ ինչպես 2022 թվականին արգելվել էր բուքմեյքերական գովազդը։