Հարյուր հիսուն հազար հայ հայրենազրկվել է Ռուսաստանի զորախմբի պատասխանատվության գոտում

Արցախի ԱԺ նախկին պատգամավոր, քաղաքական վերլուծաբան Վահրամ Աթանեսյանը «Ֆեյսբուքի» իր էջում գրել է.

Սերգեյ Քալանթարով-Լավրովի «կոնտորան» քառասունչորսօրյա պատերազմի զինադադարի հինգերորդ տարելիցի կապակցությամբ մի ճիզվիտական հայտարարություն է տարածել, որտեղ Արցախի հայ բնակչության բռնատեղահանությունը գնահատել է «դեպի Հայաստան ելք», որի անվտանգության ապահովումը վերագրել է ռուսական զորախմբի փրկչական առաքելությանը:

Նախ, ռուսական զորախումբն Արցախում էր, որպեսզի բնակչության «ելք» չլինի: Երկրորդ, Արցախից բռնատեղահանված ոչ մի մարդ Ստեփանակերտ-Կոռնիձոր Գողգոթայի ճանապարհին ռուս զինվորականի ստվեր իսկ չի տեսել, ուր մնաց, թե նրանից աջակցություն ստանա:

Ռուսական զորախմբի հրամանատարությունը սեպտեմբերի 20-ի օրվա երկրորդ կեսին արտաքսել է Ստեփանակերտի օդանավակայանի տարածքում խմբված բոլոր մարդկանց, այդ թվում՝ կանանց, երեխաներին, ծերերին եւ հաշմանդամներին:

Կոչ եմ անում Արցախից բռնատեղահանված բնակչության անունից հայաստանյան եթերներում, յութուբյան ալիքներում, Ֆեյսբուքում եւ այլուր իրենց «ճղող» բոլորին՝ կազմել բողոքի հանրագիր եւ պաշտոնապես փոխանցել Հայաստանում ՌԴ արտակարգ եւ լիազոր դեսպան Սերգեյ Կոպիրկինին եւ պահանջել, որպեսզի Կրեմլը դաադրեցնի բոլոր տեսակի շահարկումները: Ինչպես կդասավորվի Արցախից բռնատեղահանվածներիս ճակատագիրը, մեր որոշելիքն է:

Մոսկվան չպետք է նվազագույն իսկ հնարավորություն ունենա, որպեսզի սրբագրի Ռուսաստանի պատմության ամենախայտառակ էջերից մեկը:

Պատմությունը դաժան է եւ արդեն իսկ արձանագրել է, որ հարյուր հիսուն հազար հայ հայրենազրկվել է Ռուսաստանի զորախմբի պատասխանատվության գոտում, նրա ներկայությամբ, լռելյայն համաձայնությամբ եւ հանցավոր մասնակցությամբ:

Հ.Գ. Ֆեյսբուքյան ընկերներիս խնդրում եմ տարածել:

Թիվ 1