Ղազախական ընկերության ղեկավարը հայտարարել է, որ հացահատիկի մատակարարումը Հայաստան սննդային դիվանագիտության օրինակ է։
«Այս իրադարձությունը ոչ միայն տնտեսական, այլև պատմական նշանակություն ունի, քանի որ այն խոստումնալից հնարավորություններ է բացում ուղիղ տարանցման և փոխադարձ առևտրի զարգացման համար։ Ղազախական հացահատիկի արտահանման միջոցով մենք ստեղծում ենք համագործակցության նոր կամուրջներ և նպաստում բարիդրացիական հարաբերությունների վերականգնմանը, ինչպես նաև՝ տարածաշրջանի երկրների միջև վստահության ամրապնդմանը», – նշել է NC Food Contract Corporation» սննդի կորպորացիայի ներկայացուցիչը։
Ըստ նրա՝ Ղազախստանի ազգային հացահատիկի օպերատորը պատրաստ է ամսական մոտ 15-20 հզ․ տոննա հացահատիկ մատակարարել հայ սպառողներին։
Հոկտեմբերին Ղազախստանի ազգային հացահատիկի օպերատորը ստորագրել է երկարաժամկետ համագործակցության համաձայնագիր հայ սպառողներին հացահատիկի մատակարարման համար։ Փորձնական խմբաքանակը բաղկացած է 4-րդ կարգի հացահատիկից, որը կարող է օգտագործվել ինչպես ընդհանուր նշանակության ալյուր, այնպես էլ՝ անասնակեր արտադրելու համար։
Միևնույն ժամանակ, Ղազախստանը հնարավորություն ունի արտահանել տարբեր դասի հացահատիկ, ներառյալ՝ կոշտ ցորեն (դուրում) և բարձր սպիտակուցային ցորեն (hi-pro):
Երկրի գյուղնախարարության կայքում հրապարակված նյութում ասվում է, որ այս պահին բանակցություններ են ընթանում հայ գործարարների հետ։
