Լրագրող Թաթուլ Հակոբյանը գրել է.
Սերժ Սարգսյանին մեկ հարց ունեմ, միայն մեկ հարց
Երկու օրում ամբողջությամբ դիտեցի երրորդ նախագահ Սերժ Սարգսյանի յոթ ժամանոց հարցազրույցը: Մի մասը դիտում/լսում էի հոն հավաքելով, մի մասը՝ այգին մաքրելով, մի մասը՝ այլ գործեր անելով՝ հյուրեր ընդունելով, աղցան սարքելով, բայց լսեցի ծայրից ծայր:
Պարոն Սարգսյանին մեկ հարց ունեմ, միայն մեկ հարց, ու քանի որ նրան հանդիպելու և զրուցելու հնարավորություն չունեմ, կցանկանայի, որ իմ լրագրող ընկերները այդ հարցը տան առաջին իսկ հնարավորության դեպքում:
- Պարոն Սարգսյան, Դուք ասում եք, գուցե ոչ ուղղակի, բայց էությունը դա է, որ վարչապետ Փաշինյանը պետք է ընդուներ 2019 թվականի առաջարկը: Ձեզ հետ լիովին համաձայն եմ, այո՛, պիտի ընդուներ: Ես գիտեմ, Դուք գիտեք, պարոն Սարգսյան, որ այդ առաջարկը Մադրիդյան/Կազանյան փաստաթղթի ամենավատ տարբերակն էր: Եթե Դուք, ես և շատերը մեղադրում ենք, թե ինչու պարոն Փաշինյանը չընդունեց այդ առաջարկը, ապա կարող ե՞ք ասել, թե ինչու Դուք, նախագահության 10 տարիներին չգնացիք լուծման ավելի ընդունելի տարբերակով, քան 2019-ի առաջարկն էր: Հատկապես 2016-ի Ապրիլյանից հետո: Կարող եմ նաև հարցնել, թե ինչու դեմ եղաք 1997 թվականի առաջարկին, որը շատ ավելի լավն էր, քան 2019 թվականինը: Շնորհակալություն:
Հ. Գ. – Ես, քանի որ ունեմ ինստիտուցիոնալ հիշողություն, կարող եմ այդ յոթ ժամանոց հարցազրույցում գտնել էպիզոդներ, որոնք հակասում են նախագահ Սարգսյանի՝ ավելի վաղ ասած մտքերի հետ: Բայց այդպես է բոլոր քաղաքական, պետական գործիչների դեպքում:
