Փոխնախագահ Ջեյ Դի Վենսը նշել է, որ իր և պետքարտուղար Մարկո Ռուբիոյի համար առայժմ վաղ է մտածել ԱՄՆ նախագահի պաշտոնի մասին։ Փոխնախագահը հավելել է, որ ինքը չի մրցակցում պետքարտուղարի հետ, Ռուբիոն իր «լավագույն ընկերն» է վարչակազմում։
«Մարկոն մրցակից չէ։ Ոչ, Մարկոն գործընկեր է»,- ասել է Վենսը։
Նա ընդգծել է, որ ներկայումս կենտրոնացած է աշխատանքի վրա, վարչակազմը և Վաշինգտոնում գործող հանրապետական մեծամասնությունն ավելի քան մեկ տարի ժամանակ ունեն իրենց ծրագիրն իրականացնելու համար մինչև 2026 թվականի միջանկյալ ընտրությունը։
Հոկտեմբերին Թրամփը, խոսելով 2028 թվականին իր հնարավոր իրավահաջորդի մասին, լրագրողներին ասել էր. «Մենք, իհարկե, ունենք փոխնախագահ Ջեյ Դի Վենսին, նա հիանալի է: Մարկոյին, որը հիանալի թեկնածու է: Չեմ կարծում, որ որևէ մեկը կմրցակցի այս երկուսի հետ: Կարծում եմ, որ եթե նրանք երբևէ միավորվեն, նրանք անպարտելի կլինեն»:
