Բանգլադեշի դատարանը նախկին վարչապետ Շեյխ Հասինային մահապատժի է դատապարտել մարդկության դեմ հանցագործությունների մեղադրանքով։
Դատարանի դահլիճում ներկաները վճիռը ընդունել են բուռն ծափահարություններով։
Շեյխ Հասինան 2024 թ. օգոստոսին հրաժարական էր տվել բողոքի ցույցերի հետևանքով։ 78-ամյա նախկին վարչապետը ներկայումս Հնդկաստանում է։ Նա հեռավար ճանաչվել է մեղավոր երեք հոդվածով՝ այդ թվում հրահրման, սպանություններ հրահանգելու և զանգվածային վայրագությունները կանխելուց հրաժարվելու համար։
«Մենք որոշել ենք նրան նշանակել միայն մեկ պատիժ՝ մահապատիժ»,- ընթերցել է դատավորը։
Բանգլադեշում մահապատիժը կատարվում է կախաղանով։
Հնդկաստանից հրապարակված հայտարարությամբ Հասինան դատավճիռը որակել է «կողմնակալ և քաղաքականացված»՝ նշելով. «Իմ դատապարտումը նախապես էր որոշված»։
Մահապատժի է դատապարտվել նաև ներքին գործերի նախկին նախարար Ասադուզզաման Խան Կամալը, որն այդպես էլ չի ներկայացել արդարադատությանը։
Ոստիկանության նախկին պետ Չոուդհուրի Աբդուլլա Ալ-Մամունը, որը ներկայացել է դատարան և ընդունել մեղադրանքը, դատապարտվել է հինգ տարվա ազատազրկման։
ՄԱԿ-ի տվյալներով՝ Հասինայի իշխանության պահպանումը ուղեկցած ճնշումների հետևանքով զոհվել է մինչև 1400 մարդ, և այդ մահերը դարձել են նրա դատավարության կարևորագույն թեման։
