Ուկրաինայի նախագահ Վոլոդիմիր Զելենսկին նոյեմբերի 20-ի երեկոյան ամերիկյան պատվիրակության հետ հանդիպումից հետո հայտարարել է, որ Կիևը պատրաստ է աշխատել ամերիկյան նոր առաջարկների շուրջ։ Այս մասին նա գրել է իր Telegram ալիքում։ Ուկրաինայի նախագահը նշել է, որ շատ «լուրջ զրույց» է ունեցել Պենտագոնի պատվիրակության հետ, և ամերիկյան կողմը ներկայացրել է Ռուսաստանի հետ պատերազմն ավարտելու իր առաջարկները։
Նրա խոսքով՝ Ուկրաինային անհրաժեշտ է խաղաղության համաձայնագիր, որը չի խաթարի երկրի ինքնիշխանությունը և չի ստեղծի նախադրյալներ ռուսական նոր ներխուժման համար։«Ես ուրվագծել եմ մեր առանցքային սկզբունքները, և մենք պայմանավորվել ենք, որ մեր թիմերը կաշխատեն այդ առաջարկների շուրջ՝ համոզվելու, որ այդ ամենն անկեղծ է։
Մենք որևէ կոշտ հայտարարություն չենք անելու։ Մենք պատրաստ ենք հստակ և ազնիվ աշխատանքի՝ Ուկրաինան, Միացյալ Նահանգները և մեր բարեկամներն ու գործընկերները Եվրոպայում և ամբողջ աշխարհում», – նշել է Զելենսկին։
Նա հավելել է, որ առաջիկա օրերին ակնկալում է խոսել ԱՄՆ նախագահ Դոնալդ Թրամփի հետ։
«Մենք լիովին գիտակցում ենք, որ Ամերիկայի ուժը և Ամերիկայի աջակցությունը կարող են իսկապես մոտեցնել խաղաղությունը, և մենք չենք ուզում կորցնել դա», – նշել է Զելենսկին։
Զելենսկին հավաստիացրել է, որ ամբողջ ուժով կլծվի պատերազմն ավարտելու գործին։
