Մեր ժողովուրդը հոգևոր կյանքի շատ մեծ պակաս ունի, և մենք զգում ենք՝ ամեն անգամ մարդիկ ինչպես են ուրախությամբ գալիս իրենց հոգևոր կարիքները բավարարելու, նաև կիրակի օրը նվիրելու Աստծուն: Այս մասին «Լուրերի» թղթակցի հետ զրույցում ասաց ՀՀ առողջապահության նախարար Անահիտ Ավանեսյանը:
«Սա շատ կարևոր է, և սրանից կարելի է միայն ուրախանալ, որովհետև մենք տեսնում ենք մեր ժողովրդի հոգևոր արթնությունը, որը մեր երկրի բարօրության անքակտելի մասն է»,- ասաց Ավանեսյանը:
Հարցին՝ մասնակցելով վարչապետի մասնակցությամբ պատարագներին, ի՞նչ է դա փոխում մեր հասարակության ընկալման մեջ, առողջապահության նախարարը նշեց՝ յուրաքանչյուրը գալիս է հոգու փրկության, մեղքերի թողության, օրհնություն ստանալու համար:
«Իհարկե, եկեղեցին էլ համայնք է, մեկս մյուսով ենք ուժեղանում, լցվում, իրար հետ հաղորդակցությունը ևս շատ կարևոր է»,- ընդգծեց նախարարը:
Հիշեցնենք՝ ՀՀ վարչապետ Նիկոլ Փաշինյանն այսօր Արարատի Սուրբ Հակոբ եկեղեցում ներկա էր Տեր Երվանդ քահանա Բաբայանի ձեռամբ մատուցվող պատարագին:
Անահիտ Ավանեսյանը ևս մասնակցում էր պատարագին:
