«Ես դիմել եմ արհեստական բանականությանը, հնարավո՞ր է արդյոք առանց քրեական հոդվածի, մարդն ունենա մեղադրյալի կարգավիճակ։ Շատ երկար աշխատելուց, տվյալները մշակելուց հետո ինձ ասաց՝ սա աբսուրդ է, անհնար է»,-Հակակոռուպցիոն դատարանում ընթացող դատական նիստում հայտարարեց ՀՀ երկորրդ նախագահ Ռոբերտ Քոչարյանը՝ դիմելով դատավորին։
Շարունակելով ներկայացնել ԱԲ-ի պատասխանը՝ Ռ. Քոչարյանն ասաց, համացանցում եղած ողջ տվյալները մշակելուց հետո այն արձագանքել է, որ աշխարհում չկա մի երկիր, որտեղ նման բան հնարավոր է, վերջին 100 տարվա ընթացքում եղած տվյալներում ԱԲ-ն նման օրինակ չի գտել։
«Եթե մենք ողջամտությամբ շարժվենք, այս դատական նիստը չպիտի կայանար։ Ես այստեղ գալիս եմ, որովհետև եթե չես գալիս, ասում են խուսափում է։ Բայց ես այստեղ գալիս եմ ավելի շատ բարի կամք դրսևորելով, բայց ներքին համոզմունքս այն է, որ այն ինչ անում եք, աբսուրդ է։ Ստիպված եմ անում, որովհետև կա պետություն, կա դատավոր, կա դատախազ, որը բերում է, մեղադրանքներ է տալիս, բայց արհեստական բանականության պատասխանը դա է»,-հայտարարեց Ռոբերտ Քոչարյանը։
Նա նշեց, եթե ԱԲ պատասխանը սխալ է, ապա թող դատավորը նման օրինակ ներկայացնի։
Հիշեցնենք, որ ՀՀ երկրորդ նախագահ Ռոբերտ Քոչարյանը, ԶՈւ գլխավոր շտաբի նախկին պետ, ՀԱՊԿ նախկին գլխավոր քարտուղար Յուրի Խաչատուրովը և ՀՀ պաշտպանության նախկին նախարար Սեյրան Օհանյանը մեղադրվում էին սահմանադրական կարգը տապալելու մեջ։ Մինչ ընդհանուր իրավասության դատարանը քննում էր գործը, ՍԴ-ն հակասահմանադրական ճանաչեց Քրեական օրենսգրքի այդ հոդվածը։
Վճռաբեկ դատարանը 2024-ի սեպտեմբերին բեկանել է Ռոբերտ Քոչարյանի, Յուրի Խաչատուրովի և մյուսների գործը կարճելու որոշումը և թույլատրել վերաորակավորել մեղադրանքը: Ընդգծենք, որ գործով նախագահող դատավոր Սարգիս Պետրոսյանը 2018 թվականի ԱԺ ընտրությունների ժամանակ եղել է «Իմ քայլը» խմբակցության պատգամավորի թեկնածու Շիրակի մարզից:
