Ուկրաինայի նախագահ Վլադիմիր Զելենսկին հեռախոսազրույց է ունեցել իր ֆին գործընկեր Ալեքսանդր Ստուբի հետ, որի ընթացքում նրանք մտքեր են փոխանակել «Ռուսաստանի դիրքորոշման տարբեր ասպեկտների և առկա դիվանագիտական հեռանկարների գնահատականների վերաբերյալ»։ Հաղորդագրությունը հայտնվել է նրա տելեգրամյան ալիքում։
«Ես Ալեքսին տեղեկացրել եմ այն մասին, թե ինչին է պատրաստվում ուկրաինական պատվիրակությունը Ամերիկայում կայանալիք բանակցություններում, ինչպես նաև ամերիկյան կողմից ստացված ազդանշանների մասին։ Այս շաբաթ Եվրոպայում մեր գործընկերների հետ շատ աշխատանք կլինի անելու, և կարևոր է, որ մենք բոլորս ունենանք իրավիճակի ընդհանուր տեսլական և հասկանանք, որ ճնշումը Ռուսաստանի՝ որպես այս պատերազմի միակ պատճառի, այլ ոչ թե Ուկրաինայի վրա, կարող է իրականում աշխատել խաղաղության համար», – գրել է Զելենսկին։
Նախորդ օրը Ազգային անվտանգության և պաշտպանության խորհրդի քարտուղար Ռուստեմ Ումերովի գլխավորած ուկրաինական պատվիրակությունը մեկնել է Միացյալ Նահանգներ՝ մասնակցելու նոյեմբերի 30-ին նախատեսված խաղաղության բանակցություններին։
