Հռոմի Պապ Լևոն XIV-ը Ստամբուլում այցելել է Պոլսո Հայոց պատրիարքարան՝ Նիկիայի ժողովի 1700-ամյակի առիթով կատարած իր առաքելական ճամփորդության ընթացքում։
Պատրիարք Սահակ Մաշալյանը, տաճարում դիմավորելով Պապին, ողջույնի խոսքում ընդգծել է քրիստոնեական միության կարևությունը, Նիկիայի ժառանգությունը և երկու եկեղեցիների եղբայրական կապերը։
Պատրիարքը շնորհակալություն է հայտնել Պապին՝ հայ ժողովրդի ու վտանգի տակ գտնվող քրիստոնյա համայնքների հանդեպ ցուցաբերած աջակցության համար՝ հիշեցնելով, որ «հայ ազգը չի մոռանա այն քահանայապետերին, որոնք բարձրացրել են իրենց ձայնը մեր տառապանքների ժամանակ և որոնք մոտ կանգնեցին վտանգի տակ գտնվող քրիստոնյա համայնքներին ու թիկունք կանգնեցին ճշմարտությանը, այն ժամանակ, երբ աշխարհը տատանվում էր»:
Սահակ Մաշալյանը խոսել է նաև Մերձավոր Արևելքի և Թուրքիայի քրիստոնյաների դժվարությունների մասին, կոչ արել Պապին օգտագործել իր ազդեցությունը՝ տարածաշրջանի, հատկապես Լիբանանի քրիստոնյաների անվտանգությունն ապահովելու համար։
