«Այս ակցիան, որը Եվրամիության դիմաց է անցկացվում, ամոթի նշան է ԵՄ-ին, որովհետև այն արժեքները, որոնք նրանք տասնամյակներ շարունակ քարոզում էին, ի վերջո հանգեց նրան, որ Հայաստանում մենք ունենք «Հետույք» բառն արտասանելու համար խուլիգանության հանցակազմով բանտում գտնվող մարդիկ»,- ԵՄ-ի հայաստանյան ներկայացուցչության դիմաց կազմակերպած բողոքի ակցիայի ժամանակ ասաց Փաստաբան Ռուբեն Մելիքյանը։
Նա ասաց, որ ԵՄ-ի 30 տարվա օգնությունը բերել, հանգեցրել է այս հանգրվանին։
Նշելով, որ Հայաստանում կատարվողի, նաև Արշակ Սրբազանին կալանքի տանելու դատական նիստի մասին ԵՄ ներկայացուցչության դիմաց բարձրաձանելու տեղ է, Ռուբեն Մելիքյանն ասաց. «Ես գալիս եմ «Մասյացիոտնի»՝ Առաջին ատյանի քրեական դատարանի Ավանի նստավայրից, որտեղ արդեն «Արքի դատավոր»(որովհետև արդեն 3 արքեպիսկոպոս է կալանավորել) Մասիս Մելքոնյանն իր հերթական որոշումը կայացրեց՝ շատ սպասելի և մենք տեսնում ենք, որ Հայաստանում այդ թափանիվն անընդհատ առաջ է գնում և գործող իշխանությունները մեծ հաշվով շատ քիչ բաներ ունեն սահմանափակվելու»։
Փաստաբանը հիշեցրեց, որ ԵՄ-ն էր, որ ամեն առիթով պարբերաբար հայտարարություն էր անում ժողովրդավարության արժեքների պաշտպանության համար։
Մելիքյանը նշեց, որ եկել են ԵՄ ներկայացուցչության դիմաց և հույս ունեն, որ իրենց կհրավիրեն ներս և ցուցարարները փաստերով կբացատրեն, թե ինչ է տեղի ունեցել, որ «Հետույք» բառի համար մարդ կա կալանավայրում հայտնվի։
«Այս իշխանությունները բոլոր կարմիր գծերը հատելով ներկայում ստեղծել են բռնապետություն, որտեղ հանգիստ կարող են սրբազանի, յուրաքանչյուր փոդքասթի վարողի ձերբակալել»,-հայտարարեց բողոքի ակցիայի մասնակից Վահե Մովսիսյանը՝ հավելելով, որ այսօր ով քննադատում է իշխանությանը, կարող է հայտնվել բանտում։
Նրա խոսքով՝ յուրաքանչյուր մարդ, ով դեմ է Փաշինյանի հայացքներին, Թուրքիայի և Ադրբեջանի հետ հարաբերություններին, կարող է զրկվել ազատությունից, քանի որ Նիկոլ Փաշինյանը պնդում է, որ հենց ինքն է իշխանությունը։
«Այստեղ ուղիղ բռնապետության մասին է խոսքը, եթե դու դեմ ես Նիկոլ Փաշինյանին, պետք է դատվես, անկախ նրանից, թե դու ընտրված համայնքապետ ես, Սրբազան ես, որը ծառայում է Սուրբ Առաքելական եկեղեցուն, թե սովորական քաղաքացի ես»,-ասաց Մովսիսյանը։
