Ամերիկյան Axios-ը գրում է, որ ԱՄՆ նախկին փոխնախագահ, նախագահի թեկնածու Քամալա Հարիսը որոշել է չհրաժարվել քաղաքականությունից։ Այս շաբաթ նախկին փոխնախագահը հստակ ազդանշան է տվել, որ պատրաստվում է 2028 թվականի նախագահական ընտրություններին։
Չնայած Դեմոկրատական կուսակցության ղեկավարների և նվիրատուների մտավախություններին, որ Հարիսը չի կարող հաղթել, նա շարունակում է առաջատար դիրքերում մնալ 2028-ի հարցումներում։ Նա հատկապես ուժեղ աջակցություն ունի սևամորթ ընտրողների շրջանում, ովքեր վերջին տասնամյակներին վճռորոշ դեր են խաղացել դեմոկրատների նախնական ընտրություններում։
Այս շաբաթ Հարիսը մի քանի քայլ է արել, որոնք շատերը համարում են 2028-ի արշավի սկիզբ։ Նա ընդլայնել է իր գրքի շրջագայության ցանկը՝ ավելացնելով այցելություններ Հարավային Կարոլինա նահանգ և քաղաքներ, որտեղ բազմաթիվ սևամորթ բնակիչներ են ապրում։ Հարիսը նաև ելույթ է ունեցել Դեմոկրատական ազգային կոմիտեի հանդիպման ժամանակ Լոս Անջելեսում, որտեղ կոմիտեի նախագահը հումորով նշել է, որ Հարիսի ամուսինը կարող է դառնալ «թիվ մեկ տղամարդը»։
Հարիսի ներկայացուցիչը հայտարարել է, որ նա 2026-ին կշարունակի լսել ամերիկացիներին և կաջակցի դեմոկրատներին Կոնգրեսում մեծամասնությունը վերադարձնելու գործում։
