Ինձ այսօր հարցաքննել են վկայի կարգավիճակով. Սամվել Շահրամանյան

Արցախի հինգերորդ նախագահ Սամվել Շահրամանյանն այսօր կրկին կանչվել է Քննչական կոմիտե հարցաքննության նպատակով։

«Ինձ այսօր հարցաքննել են վկայի կարգավիճակով»,-լրագրողների հետ զրույցոմ ասաց նա՝ արձագանքելով հարցին, թե տեղեկություններ կային, որ այսօր նրան մեղադրանք է առաջադրվելու ու խափանման միջոց է ընտրվելու։

Թե ինչ գործի շրջանակում է հարցաքննվել Արցախի նախկին նախագահը, նա շատ փակագծեր չբացեց՝ վկայակոչելով նախաքննական գաղտնիքը։

«Այն վերաբերում է 2023 թվականին Արցախում տեղի ունեցած իրադարձություններին, ռազամական գործողություններին, դրա հետևանքներին։ Թե ինչ հարցեր են բարձրացվում, հաշվի առնելով նախաքննական գաղտնիքը, չեմ կարող ասել։ Երևի ճիշտ կլինի, որ փաստաբանը տեղեկություններ հայտնի։ Մենք երբևիցե չենք խուսափել ներկայանալու վարույթ իրականացնող մարմիններ ու տալ համապատասխան հարցերի պատասխաններ։ Այսօր ևս որոշակի հարցեր են առաջցել վարույթն իրականացնող մարմնի կողմից և մենք պարզաբանում ենք տվել այդ հարցերին»,-ասաց նա՝ ավելացնելով, որ օրեր առաջ Արցախի ներկայացուցչությունում իրականացրած խուզարկությունները որևէ կապ չունեն իր այսօրվա հարցաքննության հետ։