Կառավարությունն իր դեկտեմբերի 18-ի նիստում որոշում է կայացրել, համաձայն որի՝ 2025 թվականի նոյեմբերի 17-ից մինչև 2030 թվականի նոյեմբերի 17-ը Չինաստանից Հայաստան ներմուծվող որոշ ապրանքների նկատմամբ կկիրառվեն մաքսատուրքի վճարման արտոնություններ։
ԵԱՏՄ կանոնակարգերով Հայաստանի Հանրապետության համար սահմանվել է տարեկան 250 տոննա ծավալով հակագնագցման (դեմպինգ) տուրքի վճարումից ազատում՝ ՀՀ տարածք ներմուծվող Չինաստանի ծագում ունեցող չոր նյութի վերահաշվարկով 80 տոկոս կամ ավելի զանգված ունեցող տիտանի երկօքսիդ պարունակող գունանյութերի և պատրաստուկների համար։
Կառավարությունից հայտնում են, որ ընդունված որոշմամբ կապահովվի Եվրասիական տնտեսական հանձնաժողովի Կոլեգիայի՝ 2025 թվականի հոկտեմբերի 14-ի որոշման կատարումը, ինչը միտված է ԵԱՏՄ շրջանակում սահմանված պարտավորությունների լիարժեք իրագործմանը։
