Կինոարվեստի և գիտությունների ակադեմիան հայտարարել է, որ «Օսկար» մրցանակաբաշխությունը 2029 թվականից կլքի ABC հեռուստաընկերությունը և ամբողջությամբ կտեղափոխվի YouTube հարթակ։
YouTube-ը կստանա մրցանակաբաշխության համաշխարհային սթրիմինգային բացառիկ իրավունքները մինչև 2033 թվականը և կդառնա «Օսկարի» հիմնական հարթակը՝ ներառյալ կարմիր գորգի լուսաբանումը, թեկնածուների հայտարարությունը և այլ հարակից միջոցառումներ։ Հեռարձակումը կլինի անվճար, հասանելի ամբողջ աշխարհում, բազմաթիվ լեզուներով և փակ ենթագրերով։
Այս որոշումը պատմական է, քանի որ «Օսկարը» դառնում է առաջին խոշոր մրցանակաբաշխությունը, որը լիովին հրաժարվում է հեռուստատեսային եթերից։ Ակադեմիայի ղեկավարությունը նշում է, որ YouTube-ի հետ համագործակցությունը թույլ կտա հասնել ավելի լայն և հատկապես երիտասարդ միջազգային լսարանի։
ABC-ն, որը «Օսկարի» հիմնական հեռարձակողն է եղել ավելի քան կես դար, հայտարարել է, որ կհեռարձակի մրցանակաբաշխությունը ևս երեք տարի և 2028թ․ կմասնակցի մրցանակաբաշխության հոբելյանական 100-ամյակի միջոցառմանը։
