Առաջարկների մեծ մասն ընդունելի չեն. Ուշակով

Ուկրաինայի և Եվրամիության կողմից կարգավորման ԱՄՆ ծրագրի շուրջ արված առաջարկները բավականին ապակառուցողական են, դեկտեմբերի 21-ին հայտարարել է Ռուսաստանի նախագահի օգնական Յուրի Ուշակովը։

«Կարծում եմ, որ առաջարկների մեծ մասը, իհարկե, մեզ համար չի աշխատի։ Այո, այն, ինչ առաջարկվել է, կարծում եմ, բավականին ապակառուցողական է», – ասել է նա լրագրող Պավել Զարուբինի հետ զրույցում։

Ուշակովի խոսքով՝ Ռուսաստանը դիրքորոշում կմշակի ԱՄՆ-ի հետ Ուկրաինայի հարցում հետագա շփումների համար, այն բանից հետո, երբ Ռուսաստանի ուղղակի ներդրումների հիմնադրամի (RDIF) ղեկավար, նախագահի հատուկ ներկայացուցիչ Կիրիլ Դմիտրիևը կհաղորդի Մայամիում կայացած բանակցությունների մասին։

Նա հավելել է, որ Ռուսաստանը մտադիր է պահպանել Անքորիջում ձեռք բերված պայմանավորվածությունները։

«Դմիտրիևը որոշակի տեղեկություններ ունի կիսվելու։ Բայց մենք սպասում ենք նրա վերադարձին. հուսով եմ՝ նա կվերադառնա երկուշաբթի օրը և նախևառաջ կզեկուցի նախագահ Պուտինին իր բանակցությունների արդյունքների մասին», – ասել է Ուշակովը։