Ճապոնիան Ֆուկուսիմայի աղետից գրեթե 15 տարի անց որոշում է կայացրել վերսկսել աշխարհի ամենամեծ ատոմակայանի՝ Կաշիվազակի-Կարիվայի աշխատանքները։ «Արմենպրես»-ի փոխանցմամբ՝ այս մասին հայտնում է Reuters-ը։
Նիիգատա նահանգապետարանի ժողովը վստահության քվե է տվել նահանգապետ Հիդեյո Հանազումիին, որը նախաձեռնել է ատոմակայանի վերագործարկմանը։
Քվեարկությունից առաջ նահանգապետարանի շենքի դիմաց բողոքի ցույց է անցկացվել, որին մասնակցել է մոտ 300 մարդ։
Կաշիվազակի-Կարիվան կլինի առաջին կայանը, որը վերաբացվելու է Tokyo Electric Power Co (TEPCO)-ի կառավարման ներքո, որը նախկինում շահագործում էր վթարված Ֆուկուսիմա Դաիչի ատոմակայանը։
Հանրային NHK հեռարձակողը հաղորդում է, որ TEPCO-ն քննարկում է ատոմակայանի յոթ ռեակտորներից առաջինը հունվարի 20-ին վերագործարկելու հնարավորությունը։
«Մենք վճռականորեն հանձնառու ենք կանխել նմանատիպ վթարների կրկնությունը և ապահովել, որ Նիիգատայի բնակիչները չբախվեն նման ռիսկերի»,- հայտարարել է TEPCO-ն։
Կաշիվազակի-Կարիվայի ընդհանուր հզորությունը 8.2 ԳՎտ է, որը բավարար է մի քանի միլիոն տուն էլեկտրաէներգիայով ապահովելու համար։ Սպասվող վերագործարկումը հաջորդ տարի կհանձնի մեկ 1.36 ԳՎտ հզորությամբ բլոկ և ևս մեկ բլոկ նույն հզորությամբ արդեն 2030 թվականին։
Կաշիվազակի-Կարիվան, որը գտնվում է Տոկիոյից մոտ 220 կմ հյուսիս-արևմուտք, այն 54 ռեակտորներից մեկն էր, որոնք փակվեցին Ֆուկուսիմայի էլեկտրակայանը վնասած 2011 թվականի երկրաշարժից և ցունամիից հետո։ Ֆուկուսիմայի աղետը համարվում է ամենածանր միջուկային աղետը Չեռնոբիլից հետո։
