2027 թվականից կմեկնարկի ԿԸՀ վարչական շենքի կապիտալ նորոգումը։ Լրագրողների հետ ընթացող հանդիպմանը հայտարարեց հանձնաժողովի նախագահի պաշտոնը զբաղեցնող Վահագն Հովակիմյանը՝ անդրադառնալով մամուլի սրահում փակցված էկրանից եկող դզզոցին։
Նրա խոսքով, էկրանը մոտ ապագայում փոխել չեն կարող, բայց հիմնանորոգման ծախսերը նախատեսված են 2027-2028 թվականների բյուջեում։
«Հուսով եմ, որ այդ ժամանակ ավելի ժամանակակից տեխնիկայով վերազինված կլինի մամուլի սրահը»,-նշեց նա։
Անդրադառնալով բուն ասելիքին՝ հաջորդ տարի սպասվող ընտրություններին, Հովակիմյանը նշեց, որ խորհրդարանական ընտրությունները, ըստ Սահմանադրության կարգավորումների, պետք է անցկացվեն հունիսի 2-12-ի միջակայքում, հստակ օրը նշանակելու է Հանրապետության նախագահը։
«Գիտեք, նախագահի հրամանագիրը դեռ չկա, բայց բոլորը ընտրությունների հստակ օրն արձանագրած այսպես ասած ընթանում են առաջ, այդ օրն է հունիսի 7-ը։ Ինչո՞վ է դա պայմանավորված։ Իմ նշած ժամանակահատվածում միակ կիրակին հունիսի 7-ն է։ Եթե նախագահը ոչ աշխատանքային օր նշանակի, այսպես ասած շղթայական կարգավորումների անհրաժեշտություն կառաջանա»,-ասաց նա։
Նրա խոսքով, այս ընտրություններում կիրառվելու են մոնիտորինգի ու վերահսկողության մի շարք գործիքներ՝ մասնակիցների ֆինանսավորման գործընթացի վերահսկողությունն ավելի պատշաճ ու ժամանակակից գործիքակազմերով իրականացնելու համար։
«ԿԸՀ-ն միջազգային գործընկերների հետ համագործակցությամբ մոնիտորինգային ծրագրեր է կիրառելու, որոնք մեզ հնարավորություն կտան համացանցում տեղի ունեցող քարոզչությունն ավելի փաստարկված ու հնարավորինս ընդգրկուն մոնիտորինգի ենթարկել»,-ասաց Հովակիմյանը։
