«Որևէ մեկին չեն ձերբակալել և կալանավորել, այդ թվում նաև այն մարդկանց, որոնք պատարագի ժամանակ աղմկել են»,-Գառնու եկեղեցու դիմաց ասաց էկոնոմիկայի նախարար Գևորգ Պապոյանը՝ պատասխանելով հարցին, թե դրական կհամարի, եթե Էջմիածնի Մայր տաճարից վանկարկելու համար ՔՊ-ականի բերանը փակեն դուրս տանեն և բերման ենթարկեն։
Պապոյանը նաև հայտարարեց, թե չի տեսել, որ Էջմիածնի պատարագի ժամանակ ՔՊ-ականները եկեղեցու տարածքում հայհոյում էին հոգևորականներին և բարձարցել էին Մայր տաճարի խոյակի վրա։
Այդ պահին լրագրողի կողմից Թալինի ՔՊ-ական համայնքապետի՝ հոգևորականներին հայհոյելու տեսանյութը ցուցադրելուց հետո էլ հայտարարեց, թե այդտեղ հայհոյանք չի լսում ուղակի տեսնում է, որ եկեղեցու մեջ շատ մարդիկ կան, տեղը նեղ է, իրար «հրմշտում» են։
Պատասխանելով Փաշինյանի՝ հարվածային գործիք նվագելու տեսանյութին և խփել պարապելու մասին հարցին՝ էկոնոմիկայի նախարարն ասաց.
«Գիտեմ, որ պարոն վարչապետը՝ նախ նվեր է ստացել թմբուկը և այդ պահից սովորել է, ենթադրում եմ, որ ամիսներ է տևել։ Ինքը բանաստեղծություն էր գրել «Իրական Հայաստանի» մասին և գաղափար էր ծագել այդ բանաստեղծությունը վերածել երգի և բավականին դինամիկ, տպավորիչ երգ էր ստացվել, ոչ միայն բառերը, այլև երաժշտությունը ռիթմիկ ու պարային էր»։
