Վաշինգտոնյան փաստաթուղթը բեկումնային է դարձել տարածաշրջանում խաղաղության գործընթացի համար․ Ալիև

Վաշինգտոնյան փաստաթուղթը բեկումնային է դարձել տարածաշրջանում խաղաղության գործընթացի համար։ Այս մասին ամանորյա իր ուղերձում հայտարարել է Ադրբեջանի նախագահ Իլհամ Ալիևը։

«Փաստաթուղթը, որը Վաշինգտոնում նախաստորագրվել է ԱՄՆ նախագահի մասնակցությամբ, դիտարկվում է որպես կարևոր քաղաքական ազդանշան տարածաշրջանի՝ դիմակայության փուլից երկխոսության և համագործակցության անցնելու համար:

Ադրբեջանի առաջարկած խաղաղության օրակարգը նոր հնարավորություններ է ստեղծում տարածաշրջանային կոմունիկացիաների բացման, տնտեսական ինտեգրման և փոխշահավետ համագործակցության համար: Արդյունքում Ադրբեջանը հանդես է գալիս ոչ միայն որպես հակամարտության ավարտի առանցքային մասնակից, այլև որպես երկարաժամկետ կայունության մոդելի ձևավորման հիմնական դերակատարներից մեկը:

Հայ-ադրբեջանական հակամարտությունը լուծելու լիազորություն ունեցող Մինսկի խումբը մոռացության է մատնվել։ Այսպիսով, ղարաբաղյան հակամարտությունն ամբողջությամբ հանվել է միջազգային օրակարգից»,- ասել է նա։