Starlink ընկերությունը հայտարարել է, որ Վենեսուելայի ժողովրդին կապահովի անվճար արբանյակային ինտերտնետով մինչև փետրվարի 3-ը։ Հայտարարությունն ընկերությունը հրապարակել է X-ի իր միկրոբլոգում։
Այս հայտարարությունը հետևել է ԱՄՆ-ի կողմից Վենեսուելայի վրա հարձակմանն ու այդ երկրի նախագահի և առաջին տիկնոջ գերեվարմանը։
Միջազգային ԶԼՄ-ները սա ներկայացրել են, որպես Թրամփի արդեն նախկին աջակից, միլիարդատեր Իլոն Մասկի կողմից Վենեսուելային հայտնած աջակցություն, քանի որ ընկերությունը պատկանում է SpaceX-ին։ Ի վերջո, Մասկը կիսել է ընկերության հայտարարությունն ու ավելացրել. «Ի աջակցություն Վենեսուելայի ժողովրդի»։
Հիշեցնենք՝ հունվարի 3-ին ԱՄՆ նախագահ Դոնալդ Թրամփը հայտարարել էր, որ Միացյալ Նահանգները լայնածավալ հարված են հասցրել Վենեսուելային, և որ Վենեսուելայի նախագահ Նիկոլաս Մադուրոն և նրա կինը՝ Սիլիա Ֆլորեսը, գերի են վերցվել և դուրս են բերվել երկրից։ Լրատվամիջոցները հաղորդել են Կարակասում տեղի ունեցած պայթյունների մասին և պնդել, որ գործողությունն իրականացրել են «Դելտա Ֆորս» էլիտար ստորաբաժանման անդամները։ Վենեսուելայի իշխանությունները հայտարարել են, որ չգիտեն Մադուրոյի գտնվելու վայրը, և պահանջել էին հաստատում, որ նա ողջ է։ Դրանից հետո Թրամփը հրապարակել էր լուսանկար և պնդել, որ Մադուրոն գտնվում է ամերիկյան նավում։ Ավելի ուշ հայտնի դարձավ, որ նա ուղղաթիռով տեղափոխվել է Նյու Յորք։
«Նյու Յորք Թայմս» պարբերականն այսօր հայտնել է, որ ԱՄՆ հարձակման հետևանքով Վենեսուելայում զոհվել է 40 մարդ։
Հարավամերիկյան երկրի հրամանատարությունն անցել է փոխնախագահ Դելսի Ռոդրիգեսի ձեռքը։ Վենեսուելայի սահմանադրության համաձայն, անկախ այն բանից, թե նախագահի բացակայության ընթացքում փոխնախագահը ստանձնում է նախագահի Պարտականությունները։ Դելսի Ռոդրիգեսը վայելում է Մադուրոյի վստահությունը։
