Ռուբեն Ամորիմը հեռացել է «Մանչեսթեր Յունայթեդից»։ Անգլիական ակումբը հայտարարել է պորտուգալացի մարզչի հեռանալու մասին։
Պորտուգալացին հեռանում է տրանսֆերային քաղաքականության շուրջ տարաձայնություններից հետո։
Ամորիմը կիրակի օրը «Լիդսի» դեմ ոչ-ոքիից հետո պահանջել էր, որ իր գործընկերները հավաքագրման բաժնից «անեն իրենց աշխատանքը»։
Ամորիմը ակնկալել է, որ «Յունայթեդը» պատրաստ է աջակցել իրեն հունվարյան տրանսֆերային պատուհանի ժամանակ խոշոր ձեռքբերումների հարցում, բայց ընթացքում պարզ է դարձել, որ որևէ փոփոխություն չի լինելու։
Նրա հարաբերությունները ֆուտբոլային տնօրեն Ջեյսոն Ուիլկոքսի հետ լարված են եղել, և Ամորիմը հստակեցրել է իր հիասթափությունը «Լիդսի» դեմ խաղից հետո։
40-ամյա պորտուգալացին «Մանչեսթեր Յունայթեդը» գլխավորել է 2024 թվականի աշնանը։ Նրա ղեկավարությամբ թիմը հասել է 2024/25 թվականների Եվրոպա լիգայի եզրափակիչ, որտեղ գավաթի խաղում 1-0 հաշվով պարտվել է «Տոտենհեմին»։ Նա մարզել է թիմը 63 խաղում՝ 25 հաղթանակ, 15 ոչ-ոքի և 23 պարտություն։
«Մանչեսթեր Յունայթեդը» Պրեմիեր լիգայում զբաղեցնում է վեցերորդ տեղը՝ 20 խաղից հետո վաստակած 31 միավորով։
