Իրանի գերագույն առաջնորդ Ալի Խամենեին պետական հեռուստատեսությամբ հանդես է եկել իրանցի ժողովրդին ուղղված ուղերձով։
Ուղերձում նա կտրուկ քննադատել է ցուցարարներին՝ մեղադրելով նրանց ապակառուցողական գործունեության և արտաքին ուժերին միանալու մեջ։
Նա պնդել է, որ երեկ երեկոյան Թեհրանում և մի քանի այլ քաղաքներում «վանդալների խումբ» ոչնչացրել է իրենց երկրին պատկանող շենքերը՝ ձգտելով հաճոյանալ ԱՄՆ նախագահին։
«Այդ մարդիկ հույսերը կապում են Վաշինգտոնի հետ և գործում են Իրանին վնասելու համար։ Եթե կարող է(Թրամփը), թող նախ զբաղվի իր երկրի գործերով. այնտեղ արդեն տեղի են ունենում տարբեր միջադեպեր», – ասել է Իրանի առաջնորդը։
Նա նաև կանխատեսել է, որ Թրամփի իշխանությունը կտապալվի։
Ըստ նրա՝ ամբարտավան և բռնապետ կառավարիչները սովորաբար տապալվում են իրենց ամբարտավանության գագաթնակետին։
«Ինչ վերաբերում է այն մարդուն, որը նստած է այնտեղ՝ ամբարտավանությամբ և ինքնագոհությամբ, դատելով ամբողջ աշխարհին, նա պետք է իմանա, որպես կանոն, բռնապետներն ու ամբարտավան տերությունները, ինչպիսիք են փարավոնը, Նիմրուդը, Ռեզա Խանը, Մոհամմադ Ռեզան և այլն, տապալվել են հենց այն ժամանակ, երբ գտնվում էին իրենց ամբարտավանության գագաթնակետին։ Նա նույնպես տապալվելու է», – հայտարարել է Խամենեին։
