Իրանի նախագահ Մասուդ Փեզեշքիանը հայտարարել է, որ Միացյալ Նահանգները փորձում է ապակայունացնել իրավիճակը երկրում՝ խրախուսելով բողոքի ակցիաների մասնակիցներին։ Նրա խոսքով՝ Վաշինգտոնը նման քայլերի է դիմում այն պայմաններում, երբ նախկինում հայտարարել է դիվանագիտության և երկխոսության մասին։
Փեզեշքիանը նշել է, որ միջազգային հանրությունը ականատես է եղել, թե ինչպես ԱՄՆ կառավարությունը բանակցությունների ընթացքում, ըստ նրա, հարված է հասցրել դիվանագիտական գործընթացներին, խախտել միջազգային նորմերն ու կանոնները և կատարել գործողություններ, որոնք նա որակել է որպես հանցագործություններ մարդկության դեմ։ Նրա գնահատմամբ՝ այժմ ԱՄՆ-ը փորձում է նույն նպատակներին հասնել այլ մեթոդներով։
Իրանի նախագահի խոսքով՝ Վաշինգտոնը, Իսլամական Հանրապետությունը համեմատելով այլ երկրների հետ, փորձում է որոշ խմբերի դրդել անկարգությունների։ Նա ընդգծել է, որ նման փորձերը հաջողություն չեն ունենա։
Փեզեշքիանը հայտարարել է, որ Իրանի ժողովուրդը կշարունակի աջակցել իր երկրին և պետական համակարգին՝ դրսևորելով առավել մեծ համախմբվածություն։ Նրա խոսքերը մեջբերում է իրանական Tasnim գործակալությունը։
