Երևանի քաղաքապետարանը ներկայումս կենտրոնացած է օդի որակի խնդրի վերլուծական տվյալների հավաքագրման և այդ տվյալների հիման վրա գործողությունների կարգաբերման վրա։ Այս մասին Երևանի քաղաքապետարանի նիստի ընթացքում հայտնել է քաղաքապետ Տիգրան Ավինյանը։
«Մենք օդում, ինչ-որ մակարդակում, ինչ-որ բարձրության վրա ունենք օդի վատ ցուցանիշ, երբ այդ բարձրությունից ինվերսիոն շերտով այն իջնում է քաղաքի վրա, և ոչ միայն քաղաքի, ունենում ենք նմանատիպ խնդիր»,– նշել է նա։
Ավինյանը հավելել է, որ կանխատեսումների հիման վրա ունեն գործողություններ իրականացնելու հնարավորություն։
«Այս իրազեկվածությունն ինչո՞վ է կարևոր. ես մարդկանց հետ խոսակցությունում հասկանում եմ, որ կան ինտուիտիվ բաներ, որ մեզ իրապես թվում է, որ, օրինակ, եթե Երևան քաղաքը վերածվի մի մեծ անտառի, այս խնդիրը կվերանա։ Դա իրականությանը չի համապատասխանում»,– ասել է Երևանի քաղաքապետը։
