Սոլովյովի գարշելի պահվածը նաև սնելու է նրանց, ովքեր յոթ երգ գիտեն, յոթն էլ հիբրիդի մասին

Լրագրող Թաթուլ Հակոբյանը գրել է.

Սոլովյովի զազրելի և անմարդկային արարքը կարող են դատապարտել աշխարհի 10 միլիոն հայերից յուրաքանչյուրն իրենց սոցիալական էջերում: Հազարավորները արդեն իսկ դատապարտել են: Բայց այստեղ կարևոր է, ավելի ճիշտ՝ անհրաժեշտ, այլ բան նաև.

ա/ արգելել Ռուսաստանի իշխանությունների տեսակետներն արտահայտող այս մարդու մուտքը Հայաստան, անշուշտ նաև զրկել հայկական պարգևներից, եթե նման մեխանիզմ գոյություն ունի,

բ/ արտգործնախարարության մակարդակով դատապարտել պատերազմական անթաքույց այս կոչը,

գ/ Փաշինյան-Պուտին զրույցում, լինի հեռախոսազրույց կամ հանդիպում, ահազանգել սրա մասին, ընդ որում՝ հրապարակային:

Բոլոր մակարդակներում պետք է հիշեցնել, որ Ռուսաստանը Հայաստանում ունի.

ա/ ռազմական ներկայություն Գյումրիի 102-րդ ռազմակայանի տեսքով,

բ/ Թուրքիա-Հայաստան սահմանին կանգնած են նաև ռուս սահմանապահներ,

գ/ Հայաստանը ՀԱՊԿ անդամ է:

Տպավորություն ունեմ, որ առաջիկա ընտրություններում օրակարգի վրա է լինելու հիբրիդային պատերազմի թեման, իսկ Սոլովյովի գարշելի պահվածը նաև սնելու է նրանց, ովքեր յոթ երգ գիտեն, յոթն էլ հիբրիդի մասին: