Սա կազմակերպված հանցագործություն էր․ «Մոսադի» գործակալները գտնվում են Իրանի փողոցներում․ դեսպան

Բողոքի ցույցերը սկսվել են դեկտեմբերի 28-ին Թեհրանի շուկայում՝ ազգային արժույթի տատանումների և Իրանի կառավարության կողմից ազգային արժույթի վերաբերյալ որոշման հետևանքով առաջացած տնտեսական խնդիրների պատճառով։ Այս մասին հունվարի 14-ին մամուլի ասուլիսում հայտարարել է Հայաստանում Իրանի արտակարգ և լիազոր դեսպան Խալիլ Շիրգոլամին։

«Իրանի կառավարությունը հայտարարել է, որ բնակչությունը բողոքի ակցիաների և իր դժգոհությունն արտահայտելու իրավունք ունի, ինչն ամրագրված է Սահմանադրությամբ։ Դրա հետ մեկտեղ Իրանի կառավարությունը պարտավոր է նաև ապահովել հասարակության անվտանգությունը։Ոստիկանությանը հրահանգներ էին տրված, որ պետք է ապահովել անվտանգությունը։ Ամեն ինչ փոխվել է հունվարի 9-ին, երբ պարզ է դարձել, որ տեղի ունեցող գործընթացների նպատակն այն է, ինչ արվել է Սիրիայում», – նշել է դեսպանը։

Նա բացատրել է, որ մի փոքր խումբ կարողացել է զավթել բողոքի ցույցերը, ինչը հանգեցրել է բախումների և կրակոցների՝ ուղղված թե՛ ոստիկանության, թե՛ քաղաքացիական անձանց դեմ։

«Սա կազմակերպված հանցագործություն էր, որին մասնակցել են ահաբեկչական խմբավորումներ, որոնք հատուկ պատրաստված էին մարդկանց սպանելու համար, քանի որ Թրամփն ասել էր, որ եթե մարդիկ սպանվեն, Միացյալ Նահանգները կմիջամտի։ Իսրայելցի պաշտոնյաները, ինչպես նաև ԱՄՆ նախկին պետքարտուղար Պոմպեոն, հաստատել են, որ Մոսադի գործակալները գտնվում են Իրանի փողոցներում», – հավելել է Շիրգոլամին։