ԱԺ արտահերթ նիստի ընթացքում «Քաղաքացիական պայմանագիր» խմբակցության անդամ Վահագն Ալեքսանյանը հայտարարությամբ դիմել է «Հայաստան» դաշինքի ներկայացուցիչներին՝ հարցադրելով, թե արդյոք նրանք դուրս են եկել քաղաքականությունից և ստացել համապատասխան հրահանգ։
Նրա խոսքով՝ ներկայում քաղաքական դաշտում ակտիվություն է ցուցաբերում «ռուս օլիգարխի կուսակցությունը», քանի որ, ըստ Ալեքսանյանի, «Հայաստան» դաշինքի անցողիկ շեմը հաղթահարելու հնարավորությունները չափազանց ցածր են, իսկ քաղաքական պասիվությունը՝ ակնհայտ։
«Եթե դուք դուրս չեք եկել քաղաքականությունից, ասեք, որ իմանանք։ Ակնհայտ է, որ ձեր շանսերը շատ ցածր են, և ամբողջ տրամաբանությունը հուշում է, որ ձեզ ասել են՝ մի խոսեք ու մի երևացեք, որովհետև դուք ընդդիմադիր դաշտի ռեյտինգն եք իջեցնում»,- ասել է Ալեքսանյանը։
Նրա խոսքով՝ բոլոր փաստերը մատնանշում են նման որոշման կայացումը, իսկ ընդդիմադիրները, ըստ իրեն, գործում են որպես այդ որոշման կատարողներ։
Վահագն Ալեքսանյանը նաև արձագանքել է ընդդիմադիր պատգամավորներ Արծվիկ Մինասյանի և Արթուր Խաչատրյանի միջամտություններին՝ կոչ անելով չընդհատել իրեն։
«Մի խոսեք տեղից, երբ ես այստեղից խոսում եմ։ Խոսելու բան ունեք՝ գնացեք ուրիշ տեղերից խոսեք։ Ես կորոշեմ՝ ինչի մասին խոսեմ, դուք չեք կարող որոշել։ Գնացեք Ռոբերտ Քոչարյանին կասեք՝ ինչի մասին խոսի, եթե իհարկե կարող եք»,- ասել է նա։
