Սառնամանիքը ՌԴ-ում հասել է -38 աստիճանի. Մոսկվայում նոր ռեկորդ է սահմանվել

Անցած գիշերը Մոսկվայում դարձել է ամենացուրտը ընթացիկ ձմռան սկզբից ի վեր, ինչի մասին հայտնել է «Ֆոբոս» եղանակային կենտրոնի առաջատար մասնագետ Միխայիլ Լեուսը։

Մայրաքաղաքի գլխավոր օդերևութաբանական կայանի՝ ՎԴՆԽ-ի տվյալներով, օդի նվազագույն ջերմաստիճանը իջել է մինչև -17,3 աստիճան։ Մինչ այդ, ձմռան ամենացուրտ օրը համարվում էր 2025 թվականի դեկտեմբերի 24-ը՝ -16,4 աստիճան ցուցանիշով։ Մեգապոլիսի տարբեր կայաններում ջերմաստիճանային ցուցանիշները տատանվել են -14,5-ից (Բալչուգ) մինչև -20,8 աստիճան (Բուտովո)։ Նոր Մոսկվայում՝ Միխայլովսկոյեում, սառնամանիքն ավելի է ուժգնացել՝ հասնելով մինչև -26,4 աստիճանի։

Մոսկվայի մարզում ջերմաչափի ցուցմունքները գրանցվել են -14,2 (Սոլնեչնոգորսկ) և -28,2 աստիճանների (Չերուստի) միջև, ինչը նույնպես ռեկորդային ցածր ցուցանիշ է մարզի համար ընթացիկ ձմռան ընթացքում։

Փորձագետի տեղեկություններով, Կենտրոնական դաշնային տարածաշրջանում սառնամանիքները մոտեցել են 30 աստիճանի սահմանագծին. Վլադիմիրի մարզի Վյազնիկի քաղաքում ջերմաչափի սյունը իջել է մինչև -29,8 աստիճան։

Ռուսաստանի եվրոպական տարածքում ամենացուրտ վայրն է դարձել Պերմի երկրամասի Կրասնովիշերսկի շրջանի Վայա ավանը, որտեղ գիշերային նվազագույն ջերմաստիճանը կազմել է -38,2 աստիճան։