«Այսօր ունենք բանակցային մի դիրք, որը պետք է լավարկել։ «Թրամփի ուղին» խաղաղության պայմանագրի բաղկացուցիչ, ամենակարևոր մասերից մեկն է»,-Պետրոս Ղազարյանին տված հարցազրույցում ասաց «Մեր Ձևով» շարժման համակարգող Նարեկ Կարապետյանը՝ պատասխանելվ հարցին՝ կո՞ղմ, թե՞ դեմ են «Թրամփի ուղու» վերաբերյալ հայտարարությանը։
Ըստ նրա, հիմնական խնդիրն է. ««Թրամփի ուղով» մենք մեր հասարակության մեջ սխալ սպասելիքներ չտանք, թե խաղաղությունը երաշխավորված է Ամերիկայի կողմից։ Մեզ պետք է ոչ թե վկա, այլ մեզ պետք է երաշխավոր»։
Նա նշեց, որ իրենք տեսնում են տարածաշրջանային բազում դեպքերի ժամանակ, որևէ երկիր ունենում է ընդամենը մեկ երաշխավոր, տարբեր ժամանային փոփոխությունների արդյունքում այդ երաշխավորն ունենում է իր ազգային առաջնահերթությունները, ու այն երկիրը, ում երաշխավորում են, մնում է առանց պաշտպանության։
«Մեկից ավելի երաշխավորը մեզ կօգնի, որպեսզի ունենանք երկարաժամկետ երաշխավորված խաղաղություն, իսկ վկայի կարգավիճակն այս պահին, կարծում եմ, բավարար չէ»,- ասաց Ն.Կարապետյանը։
Նա նշեց, որ ողջունելի է Հայաստանի անվտանգային հարցերով ունենալ ԱՄՆ նման գերտերության մասնակցություն, սակայն կան հարցեր՝ ինչքան է ամրապնդված լինելու Հայաստանի տարածքային ամբողջականությունը, ինչքան է գործելու այդտեղ Հայաստանի օրենսդրությունը, խաղաղության պայմանագրում Հայաստանը պետք է ունենա երաշխավոր։
Նարեկ Կարապետյանն ասաց, որ իրենց նպատակն է Հայաստանի համար հասնել տարածաշրջանային խաղաղ համակեցության՝ ուղղակի մի քանի տարբերությամբ. «Մենք պետք է աշխատենք այն ուղղությամբ, որպեսզի թույլ չտանք մեր հարևան երկրներին ժողովրդագրական վտանգ ներկայացնեն Հայաստանի համար, աշխատենք այն ուղղությամբ, որպեսզի թույլ չտանք ադրբեջանական արհեստական համայնք ձևավորվի Հայաստանում»։
«Պետք է աշխատենք, որպեսզի պայմանագիրը չլինի թղթի կտոր, այլ երաշխավորված ուժերի կողմից։ Տարածաշրջանային կոնֆլիկտների լուծման շրջանակում վերջնականապես ոչ թե հակադրություններով, այլ համակեցությամբ կարող ենք լուծել մեր տարածաշրջանի խնդիրները ու Հայաստանը վերածվի հյուսիս-հարավ, արևելք-արևմուտք իրապես խաղաղ խաչմերուկի, բայց հայկական սուվերեն տարածքով»,- ասաց Նարեկ Կարապետյանը։
