Հայաստանի ԳԽ և ԼՂՀ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․
«Համացանցում Արցախի Ազգային ժողովի նիստից արխիվային տեսանյութ է տարածվել: Պատգամավորը կառավարության ներկայացուցչին հարցնում է, թե ի՞նչ նպատակով է պաշտոնաթող նախագահին տարեկան քսան միլիոն դոլար հատկացվում: Տեսանյութը, բնականաբար, հարուցել է Հայաստանի հանրության ամենատարբեր ներկայացուցիչների տարակուսանքը, վրդովմունքը, զայրույթը: Այդ ամենը հասկանալի եւ ընդունելի կլիներ, եթե գործ չունենայինք կամ «լեզվի սայթաքման», կամ պարզ մանիպուլյացիայի, կամ կանխամտածված կեղծիքի հետ:
Արցախի պաշտոնաթող նախագահի գրասենյակի պահպանման համար, այո, բյուջեից ամենամյա հատկացումներ արվել են, բայց ոչ քսան միլիոն դոլարի չափով: Եթե հիշողությունս չի դավաճանում, նման գումար առաջին անգամ հատկացվել է 2008թ.-ին՝ Արկադի Ղուկասյանի պաշտոնաթողությունից հետո եւ կազմել է յոթ միլիոն դրամ: Հետագայում գումարն ավելացել է, գուցե վերջին տարիներին հասել է քսան միլիոնի, բայց հաստատ՝ դրամով: Իսկ թե ինչու Ստեփանակերտի քաղէլիտայի ներկայացուցիչներն այդ տեսանյութի ծանրագույն տպավորությունը ցրելու փորձ իսկ չեն անում, արտառոց է: Մի՞թե նրանց ձեռնտու է, որ Հայաստանի հանրությունն Արցախի նախկին իշխանություններից խորը հիասթափվելու ս մեկ առիթ ունենա:
Հ.Գ. Լուրջ մարդկանց, որ այդ տեսանյութի վերաբերյալ հեռուն գնացող դատողություններ են անում, խորհուրդ կտայի դիմել ԱԺ-ին և պարզել, թե ՀՀ պաշտոնաթող երեք նախագահների գրասենյակի պահպանման համար տարեկան որքա՞ն գումար է հատկացվում բյուջեով և ըստ այդմ կողմնորոշվել»:
