«Իր զինվորականների արյունն ուրացող Պուտինը Արցախի փրկիչ լինել չի կարող»․ Վահրամ Աթանեսյան

Հայաստանի ԳԽ և ԼՂ ԱԺ նախկին պատգամավոր Վահրամ Աթանեսյանը «Ֆեյսբուքի» իր էջում գրել է․

Ֆեյսբուքի երիտասարդ օգտատերը, ով անկախ Հայաստանում Կառավարման ակադեմիա է ավարտել, գրում է, որ եթե Արցախում ռուս խաղաղապահներ չլինեին, հայ բնակչությունը ցեղասպանության կենթարկվեր՝ ինչպես 1915թ.-ին: Անկախ ՀՀ Կառավարման ակադեմիայում նրան ոչ ոք չի ասել, որ Օսմանյան Թուրքիայում հայոց ցեղասպանությունը կատարվել է Ռուսական կայսրության զորքերի աչքի առաջ: Նա տեղյակ չէ, որ 2023թ. սեպտեմբերի 19-ին Ադրբեջանի հատուկ նշանակության զորաջոկատը դիմահար կրակահերթերով ՌԴ վեց բարձրաստիճան սպա է գնդակահարել եւ մնացել անպատիժ: Կամ գիտի, բայց միտումնավոր մանիպուլյացիա է ենթարկում հայ հանրությանը: Դրանից քիչ բան է փոխվում. իր զինվորականների արյունն ուրացող Պուտինը ոչ միայն Արցախի հայ բնակչության փրկիչ, այլեւ Հայաստանի դաշնակից լինել չի կարող: Մի մեծ աղետ՝ հայոց ցեղասպանությունը, մենք տասնամյակներ շարունակ խեղաթյուրված ենք ընկալել եւ ներկայացրել: Երկրորդը կեղծելու իրավունք ոչ ոք չունի, քանզի ողբերգությունը կատարյալ է դառնում, երբ այն ներկայացվում է որպես երրորդ կողմի «ապահոված փրկություն»: Այդպես փակվում է վերագտնումի ճանապարհը: