Մկրտիչ սրբազանի կալանքը երկարացվեց. վերացվեցին բոլոր տեսակի սահմանափակումները

Արագածոտնի թեմի առաջնորդ Մկրտիչ սրբազանի կալանքը երկարացվել է մեկ ամսով, իսկ նրա նկատմամբ կիրառված բոլոր տեսակի սահմանափակումները վերացվել են։ Որոշումը հրապարակել է նիստը նախագահող դատավոր Դավիթ Դաբաղյանը։

Նշվում է, որ այսօր Արագածոտնի թեմի առաջնորդ Մկրտիչ եպիսկոպոս Պռոշյանի գործով կայացել է առաջին դատական նիստը, որի ընթացքում հանրային մեղադրող Տիգրան Մուրադյանը միջնորդություն է ներկայացրել կալանքի ժամկետը երկարաձգելու վերաբերյալ։

Մկրտիչ եպիսկոպոս Պռոշյանը մեղադրվում է երկու հոդվածներով՝ ընտրական իրավունքին խոչընդոտելը՝ իշխանական կամ ծառայողական լիազորություններն օգտագործելով, ինչպես նաև հավաքներին մասնակցելուն հարկադրելը՝ նույն լիազորությունների կիրառմամբ։

Հիշեցնենք, որ 2025 թվականի հոկտեմբերի 15-ի առավոտյան Մայր Աթոռը տեղեկացրել էր Արագածոտնի թեմի առաջնորդի և թեմի մի շարք այլ հոգևորականների ձերբակալման մասին։