Քննչական կոմիտեում քրեական վարույթ է նախաձեռնվել «Մեր ձևով» շարժման համակարգող Նարեկ Կարապետյանի վերաբերյալ. Radar Armenia-ն տեղեկացավ ՀՀ քննչական կոմիտեից։
Radar Armenia-ի գրավոր հարցմանն ի պատասխան ՔԿ-ից հայտնել են, որ նախաձեռնված քրեական վարույթի նախաքննությամբ պարզվել է, որ կենտրոնական բժշկական հանձնաժողովի եզրակացությամբ Նարեկ Կարենի Կարապետյանը ճանաչվել է ոչ պիտանի խաղաղ ժամանակ զինվորական ծառայության համար, պիտանի է զինվորական ծառայության համար սահմանափակումով՝ պատերազմական ժամանակ և «Զինապահության մասին» ՀՀ օրենքի 15-րդ հոդվածի 2-րդ կետի հիմքով հաշվառվել է պահեստազորում:
«Նարեկ Կարապետյանի՝ հնարավոր առողջական խնդիրների հետ կապված մի շարք հանգամանքներ պարզելու նպատակով քրեական վարույթով նշանակվել է հանձնաժողովային դատաբժշկական փորձաքննություն, որի շրջանակում վերջինս ներկայացել է փորձագետներին, սակայն հրաժարվել է պարտադիր ժամկետային զինվորական ծառայությունից ազատվելու համար նախկինում պատճառ դարձած առողջական խնդրի կապակցությամբ հետազոտություններ անցնելուց:
Քրեական վարույթի նախաքննությունը շարունակվում է»:
Թե ինչ կարգավիճակ ունի Կարապետյանն այս գործով, և արդյոք հարցաքննվել է, ՔԿ-ից չեն հայտնել. «քանի որ դրանք պարունակում են քրեական վարույթի հրապարակման ոչ ենթակա տվյալներ»,- պատճառաբանել են Կոմիտեից:
Նշենք, որ «Մեր ձևով» շարժման խոսնակ Մարիանա Ղահրամանյանն էլ ավելի վաղ հաստատել է Նարեկ Կարապետյանի նկատմամբ քրեական վարույթ հարուցելու լուրերը. «Նշված վարույթը հարուցվել է դեռ ամիսներ առաջ` Թաքեր Կարլսոնի հետ հայտնի հարցազրույցից հետո»,- հայտնել էր նա։
