Եվրոպական միությունն ու Հնդկաստանը համաձայնեցրել են ազատ առևտրի համաձայնագիրը։ Այդ մասին հայտնել է Հնդկաստանի վարչապետ Նարենդրա Մոդին։ Նրա խոսքով՝ համաձայնագիրը ընդգրկում է համաշխարհային տնտեսության շուրջ մեկ քառորդը և գլոբալ առևտրի մեկ երրորդը՝ բացելով «հսկայական հնարավորություններ» Հնդկաստանի և Եվրոպայի համար։
Բանակցությունները տևել են գրեթե երկու տասնամյակ և ավարտվել են առևտրային պատերազմների և ԱՄՆ նախագահ Դոնալդ Թրամփի սակագնային քաղաքականության ֆոնին։ Բրյուսելում և Նյու Դելիում այս համաձայնագիրը դիտարկվում է որպես ռազմավարական քայլ և ԱՄՆ-ից կախվածությունը նվազեցնելու, ինչպես նաև տնտեսական կապերը դիվերսիֆիկացնելու միջոց։ ԵՄ-ն այժմ համարվում է Հնդկաստանի խոշորագույն առևտրային գործընկերը։
Համաձայնագիրը նախատեսում է մաքսատուրքերի լայնածավալ նվազեցում և վերացում, եվրոպական ապրանքների մեծ մասի համար դրանք կզրոյացվեն։ Մասնավորապես, կվերացվեն մինչև 44% մաքսատուրքերը ավտոմեքենաների և էլեկտրական սարքավորումների վրա, 22%՝ երկաթի և պողպատի վրա, ինչպես նաև մինչև 50%՝ վերամշակված սննդամթերքի վրա։ Գինու մաքսատուրքերը կնվազեն 150%-ից մինչև 20–30%, իսկ ձիթապտղի յուղը և այլ բուսական յուղերը կդառնան անմաքս։
Մի քանի ամիս տևող իրավական ստուգումից հետո համաձայնագիրը կարող է ուժի մեջ մտնել մեկ տարվա ընթացքում։
