Հնդկաստանի Արևմտյան Բենգալիա նահանգում գրանցվել է Նիպահ վիրուսի բռնկում, որը վտանգ է ներկայացնում մարդկանց կյանքի համար։ Հիվանդության տարածումը կանխելու նպատակով Ասիայի մի շարք երկրների իշխանությունները խստացրել են Հնդկաստանից ժամանող ուղևորների ստուգումները։
Թաիլանդը սկսել է ստուգել Արևմտյան Բենգալիայից թռիչքներ ընդունող երեք օդանավակայաններում ժամանող ուղևորներին։ Նեպալը ստուգում է ոչ միայն Կատմանդու օդանավակայանով ժամանողներին, այլև Հնդկաստանի հետ ցամաքային սահմանային անցակետերով երկիր մտնողներին։
Ղրղզստանի, Ղազախստանի և Ուզբեկստանի իշխանություններն էլ խստացրել են սահմանային անցակետերում բժշկական հսկողությունը։
Հունվարի սկզբին Արևմտյան Բենգալիայում վիրուսով վարակվել է հինգ բուժաշխատող։ Նրանցից մեկը գտնվում է ծանր վիճակում։ Նրանց հետ շփված մոտ 110 անձ տեղափոխվել է կարանտին։
Վիրուսը կարող է փոխանցվել կենդանիներից մարդկանց։ Քանի որ հիվանդության դեմ պատվաստանյութ կամ բուժում գոյություն չունի, մահացության մակարդակը շատ բարձր է՝ 40-ից մինչև 75 տոկոս։
