«Չափազանց հետաքրքիր պրոցեսներ են ընթանում։ Հին աշխարհակարգը փլվել է, նորը ձևավորվում է»,-ասաց ՀՀ երկրորդ նախագահը՝ խոսելով արտաքին աշխարհքաղաական գործընթացների մասին։
Նրա խոսքով, ամենահետաքրքիրն այն է, որ ԱՄՆ-ն ապամոնտաժում է իր իսկ ձեռքով կառուցած աշխարհակարագը։
«ԱՄՆ անվտանգության նոր հայեցակարգում արձանագրված է, որ աշխարհն այլևս բազմաբևեռ է։ Ընդունում են, որ հրաժարվում են գաղափարական հեգեմոնիայից։ Հետաքրքիր արձանագրում, որ հիմնական հակառակաորդն այսօր Չինաստանն է, Ռուսաստանի հետ պատրաստ են և տեսնում են հնարավորություն Ռուսաստանի հետ կառուցողական և պրագմատիկ հարաբերություններ կառուցել, Եվրոպայի գնահատականը եվրոպացիների համար նվաստատուցիչ էր, Եվրոպան դեգրադացվում է, այդ բառը չի օգտագործվում, բայց ամբողջ բնութագիրը նշանակում է հենց դա և տնտեսական, և արժեհամակարգային, և այլն, և այլն»,-մանրամասնեց Ռոբերտ Քոչարյանը։
Նա նկատեց, ըստ փաստաթղթի, ԱՄՆ հետաքրքրությունների շրջանում չէ Հարավային Կովկասը։
«Այդ փաստաղթում զրո հիշատակում Հարավային Կովկասի մասին, սա նշանակում է, որ ԱՄՆ-ն այստեղ չունի ֆունդամնետալ շահեր ոչ տնտեսական, ոչ էլ անվտանգային։ Սա է իրականությունը»,-ասաց նա։
Այս գործընթացներում ի՞նչ պետք է անի Հայաստանը։ Նախկին նախագահի գնահատմամբ, աշխարհը հիմա շատ ավելի վտանգավոր է։
«Հայաստանը պետք է անի ամեն ինչ գերտերությունների շահերի բախման կետում չհայտնվելու համար։ Անցած անգամ նման ձևակերպումն եմ տվել, հիշեցնեմ՝ հմուտ նավապետը փոթորիկի ժամանակ իր նավը օվկիանոս չի հանում՝ չվտանգելու համար և նավը, և անձնակազմը, սա ուղղակի վերաբերում է Հայաստանի Հանրապետությանը»,-նշեց նա։
