Ռոբերտ Քոչարյանն անդրադարձել է նախկին նախագահների՝ քաղաքականությունից հեռանալու և ընտրություններին չմասնակցելու կոչերին։
Նա նշել է, որ այս հարցը հնչեցնելիս՝ իրեն հետաքրքիր է, թե ինչն է «նախկինների նույնացման հիմքում»․
«Բնավորությամբ լրիվ տարբեր ենք երեք նախկին նախագահներս։ Եթե հնարավոր է իրարից շատ հեռու մարդիկ հորինել, ապա այդ երեք նախկին նախագահներս ենք՝ Տեր-Պետրոսյանը, ես և Սերժ Սարգսյանը։ Լրիվ տարբեր ենք բնավորություններով։ Հայացքներով ևս լրիվ տարբեր ենք։ Աշխատանքի ոճով՝ ևս։ Մեր աշխատած տարիների արդյունավետությամբ՝ ևս։ Թիմային տեսանկյունից՝ ևս լրիվ տարբեր ենք։ Ի՞նչն է մեզ միայն միացնում. Մեր աշխատանքային գրքույկը, որում գրված է՝ նախագահ ենք եղել։ Ուրիշ բան մեզ չի միացնում»,- ասել է նա։
Նա նաև հիշեցրել է, որ 2008թ. նախագահի պաշտոնը թողնելուց հետո որևէ պետական պաշտոն չի պահել. «Իմ կյանքի ամենից երջանիկ տարիները եղել են 2008-2018 թվականները՝ ազատ մարդ, աշխատել եմ հսկայական ընկերությունում, մեծ գումար եմ վաստակել և պատասխանատվություն չեմ կրել ամեն ինչի համար։ Սա մի ուրիշ հաճույք է մի մարդու համար, որը 1988-2008թթ. ծանր փորձություններով էր անցում՝ կրիզիսային, ճգնաժամային իրավիճակներում պատասխանատվությունն իր վրա ստանձնում։ Հիմա այն վիճակն է, որ ևս ճգնաժամային է, ևս պատասխանատվություն ստանձնելու կամ դրանից խուսափելու ընտրության առջև եմ կանգնած։ Ես համարում եմ, որ ինձնից լավ ոչ ոք չի կարող այս վիճակից երկիրը հանել։ Դրա համար եմ մասնակցում։ Եթե մեկի անունը տաք, որ ավելի մեծ փորձ ունի բոլոր ուղղություններով, շատ լավ»։
