Այս պահին իրականացվում է «Հայաստանի էլեկտրական ցանցեր» ընկերության (ՀԷՑ) շուկայական արժեքի գնահատում։ Այդ մասին Կառավարության ճեպազրույցի ընթացքում հայտարարել է վարչապետ Նիկոլ Փաշինյանը՝ նշելով, որ եթե ՀԷՑ-ի շուկայական արժեքը լինի հասանելի պետական բյուջեի համար, ապա ընկերությունը ամբողջությամբ կպետականացվի։
Վարչապետի խոսքով՝ պետականացման դեպքում ՀԷՑ-ը կհանձնվի հավատարմագրված կառավարման՝ միջազգային բարձր պրոֆեսիոնալ կառավարման ընկերության կամ ընկերությունների խմբի։
Նիկոլ Փաշինյանը կարևորել է նաև այն հանգամանքը, որ ՀԷՑ-ը որպես գործընկեր բացվել է տասնյակ ընկերությունների առաջ։ Նրա խոսքով՝ նախկինում ընկերության մրցույթներին հիմնականում մասնակցում էին նախկին կառավարիչների հետ փոխկապակցված ընկերություններ, ինչը, ըստ վարչապետի, փաստացի ձևավորել էր կոռուպցիոն և փողերի լվացման համակարգ։
Վարչապետը նշել է, որ այդ մեխանիզմները բացահայտվել են, և դրանց շրջանակում արդեն իսկ հարուցվել են քրեական գործեր։
