Հեղինակավոր The New York Times պարբերականը գրում է, որ Իրանը հնարավոր է լուրջ փոխզիջման գնա ԱՄՆ-ի հետ միջուկային ծրագրի հարցում։ Այս մասին պարբերականը գրում է՝ հղում անելով իրանցի երկու բարձրաստիճան պաշտոնյանների։
Իրանը պատրաստ է կասեցնել կամ դադարեցնել իր միջուկային ծրագիրը՝ լարվածությունը թուլացնելու համար և նախընտրում է ԱՄՆ-ի կողմից աջակցվող միջուկային էներգիայի տարածաշրջանային կոնսորցիումի ծրագիրը։ Թեհրանը հարստացված ուրանն էլ կփոխանցի Ռուսաստանին։
Հաղորդվում է, որ Իրանի Գերագույն առաջնորդի խորհրդական Ալի Լարիջանին վերջերս Վլադիմիր Պուտինին է փոխանցել Խամենեիի ուղերձը՝ առաջարկելով Իրանի հարստացված ուրանը ուղարկել Ռուսաստան՝ համաձայն 2015թ․ համաձայնագրի։
Պաշտոնյաների խոսքով՝ նման փոխզիջման նպատակը կլինի լարվածության մեղմացումը ԱՄՆ-ի հարվածի սպառնալիքի պայմաններում։ Իրանը նախընտրում է այլընտրանքային առաջարկը, որը նախատեսում է տարածաշրջանային կոնսորցիումի ստեղծում՝ միջուկային էներգիայով էլեկտրաէներգիա արտադրելու համար, որտեղ ուրանի հարստացումը կիրականացվի Իրանի սահմաններից դուրս։
