Ադրբեջանից ներմուծված բենզինի ազդեցությունը Հայաստանում գների վրա տեսանելի կլինի հունվար ամսվա գնաճի մեջ։ Այս մասին այսօր լրագրողների հետ հանդիպման ընթացքում հայտարարել է ՀՀ կենտրոնական բանկի նախագահ Մարտին Գալստյանը՝ պատասխանելով Sputnik Արմենիայի հարցին, թե հարևան երկրներից ապրանքների ներմուծումն ու ապաշրջափակումն ինչ ազդեցություն կարող են ունենալ գների վրա։
Գալստյանը նշել է, որ այս պահին նման վերլուծություն դեռ չկա, քանի որ տվյալ տեսակի ապրանքների ներմուծման ծավալները բավականին փոքր և սահմանափակ են։
«Այնուամենայնիվ, բենզինի ներմուծման արդյունքում որոշակի ազդեցություններ կտեսնենք, սակայն կարծում եմ, որ դրանք էական չեն լինի»,– ընդգծել է ԿԲ նախագահը։
Նրա խոսքով՝ բաց սահմանների, ինչպես նաև ապրանքների և ծառայությունների ազատ տեղաշարժի ապահովումը՝ ներմուծման և արտահանման տեսանկյունից, ընդհանուր առմամբ դրական ազդեցություն կունենա տնտեսության վրա։
