Ֆրանսիայի խորհրդարանի ստորին պալատը միաձայն ընդունել է բանաձև, որով պահանջում է Ադրբեջանում պահվող Արցախի ռազմաքաղաքական ղեկավարության ներկայացուցիչների, ինչպես նաև բոլոր հայ ռազմագերիների անհապաղ և անվերապահ ազատումը։
Փաստաթուղթն ընդունվել է 183 կողմ, 0 դեմ ձայներով։
Փաստաթուղթը զգուշացնում է, որ հայ գերիներին պահելը և դատական հետապնդումները կարող են վտանգել 2025 թվականի օգոստոսի 8-ին Վաշինգթոնում ստորագրված համատեղ հայտարարության իրականացումը:
Բանաձևում վերահաստատվում է աջակցությունն Արցախի հայ բնակչությանը, որը բռնի կերպով տեղահանվել է իր պատմական հայրենիքից, ինչպես նաև շեշտվում է Արցախի հայերի ինքնորոշման իրավունքը և միջազգային հանրության պատասխանատվությունը՝ Ադրբեջանից Արցախի հայերի անվտանգ վերադարձի երաշխիքներ պահանջելու հարցում։
