«Ես հայ ժողովրդի պատմության ամենաբարձր կուսակցության անդամ եմ ինձ համարում, նորից թույլ տվեք կրկնել՝ ես գրող եմ, մտավորական, ես մեր ժողովրդի պատմությունը գիտեմ և իրավունք ունեմ այսօրվա իրադարձությունները՝ լինեն քաղաքական թե կուսակցական, մտավորականի դիրքերից վերլուծելով` եզրակացություններ անել, իհարկե, պահպանելով կոռեկտության սահմանները»,- հայտարարել է Հեռուստատեսության և ռադիոյի հանձնաժողովի անդամ Հակոբ Հակոբյանը։
ԱԺ «Հայաստան» խմբակցությունը նախագիծ է ներկայացրել նրա լիազորությունները դադարեցնելու համար։ Ըստ ընդդիմադիր պատգամավորների՝ Հակոբյանը չի պահպանել քաղաքական չեզոքություն ու ՀՅԴ հասցեին քննադատական, վարկաբեկիչ արտահայտություններ է արել։
«Հայ ժողովրդի պատմության, ինչպես նաև նրա քաղաքական իրավիճակների մասին խոսելը միայն կուսակցական դիրքորոշում չի պահանջում»,- ասել է նա:
«Ձեր մեղադրանքի մեջ հիմնականը, որ ինձ վերաբերում է, կոռեկտության սահմանները խախտելն է: Ես երեկ իմ ելույթի մեջ ասացի՝ լավ կլիներ, որ ընդհանրապես այդ «կոռեկտություն» հասկացության մի սահմանումը տրվեր: Կոռեկտ լինել չի նշանակում Գլավլիտի տակ լինել և չի նշանակում կոնյուկտուրայի նպատակներով կամ վախերով՝ պաշտոնը կորցնելու կամ Ազգային ժողովի որոշ՝ քո հայացքները չկիսող կամ խմբակցությունների կողմից քննադատվելուց վախենալով ծպտուն չհանել»,- ասել է նա։
