ԱՄՆ հետախուզական ԱԹՍ-ները՝ Իրանի ափերի մոտ

ԱՄՆ զինված ուժերը հետախուզական թռիչքներ են իրականացրել Իրանի սահմանների հարակից տարածքներում։ Գործողություններին մասնակցել են Boeing P-8A Poseidon տիպի հակասուզանավային ինքնաթիռը և MQ-4C Triton հետախուզական անօդաչու սարքը։ Տվյալները հրապարակվել են ավիացիոն Flightradar24 հարթակի հիման վրա։

Անօդաչուն օդ է բարձրացել Արաբական Միացյալ Էմիրությունների Ալ-Դաֆրա ավիաբազայից և մի քանի ժամ շրջել Օմանի ծոցի միջազգային ջրերի վրա՝ Իրանի սահմաններին հարակից հատվածում։

Հավելենք՝ MQ-4C Triton-ը նախատեսված է մեծ տարածքների մշտադիտարկման համար՝ ապահովելով հետախուզական տեղեկատվություն իրական ժամանակում ինչպես ծովային, այնպես էլ առափնյա գոտիներում։ Սարքը կարող է օդում մնալ ավելի քան 30 ժամ, զարգացնել մինչև 610 կմ/ժ արագություն և թռչել մինչև 17 հազար մետր բարձրության վրա։

Ներկայում Ալ-Դաֆրա ավիաբազայում տեղակայված են երեք ամերիկյան MQ-4C Triton անօդաչու սարքեր։