Վրաստանի վարչապետ Իրակլի Կոբախիձեն հայտարարել է, որ Թբիլիսին Ռուսաստանի հետ չի վարել բանակցություններ ոչ դիվանագիտական հարաբերությունների վերականգնման, ոչ էլ երկաթուղային հաղորդակցության վերագործարկման վերաբերյալ։ Նրա խոսքով՝ նշված հարցերով որևէ շփում չի եղել։
Կոբախիձեն այս մասին ասել է լրագրողների հարցին ի պատասխան՝ պարզաբանելով, թե արդյոք եղել է «ոչ պաշտոնական» հաղորդակցություն ռուսական կողմի հետ։ Վարչապետը նշել է, որ եթե այդ ուղղությամբ նոր զարգացումներ լինեն, կառավարությունը համապատասխան տեղեկատվությունը կներկայացնի հանրությանը։
Փետրվարի 12-ին Ռուսաստանի փոխվարչապետ Ալեքսեյ Օվերչուկը հայտարարել էր, որ քննարկվում է Աբխազիայի տարածքով Ռուսաստանի և Վրաստանի միջև երկաթուղային հաղորդակցության վերականգնման հնարավորությունը։
Ռուսաստանի և Վրաստանի միջև դիվանագիտական հարաբերություններ չկան։ Երկխոսությունը շարունակվում է Ժնևի քննարկումների ձևաչափով։ Թբիլիսին խզել է դիվանագիտական հարաբերությունները Մոսկվայի հետ 2008 թվականի օգոստոսի 26-ին՝ այն բանից հետո, երբ Ռուսաստանը ճանաչեց Աբխազիայի և Հարավային Օսիայի անկախությունը։ Վրաստանը չի ճանաչում այդ տարածքների ինքնիշխանությունը՝ դրանք համարելով օկուպացված։
