Եգիպտոսի սահմանային անցակետերում տրամադրվող մուտքի արտակարգ վիզայի վճարը կբարձրանա՝ ներկայիս 25 ԱՄՆ դոլարից դառնալով 30 ԱՄՆ դոլար. հայտնում է Cairo 24-ը։ Նոր սակագինը կգործի 2026 թվականի մարտի 1-ից։
Որոշումը, ըստ հաղորդագրության, ընդունվել է Եգիպտոսի սահմանային անցակետերում մուտքի գործընթացների կարգավորման շրջանակում։
Եգիպտոսի զբոսաշրջային ընկերությունների պալատը կոչ է արել տուրիստական ընկերություններին ձեռնարկել անհրաժեշտ քայլեր՝ իրենց զբոսաշրջային փաթեթներն ու ծրագրերը թարմացնելու և արտասահմանյան գործընկերների հետ աշխատանքը նոր սակագներին համապատասխանեցնելու համար։ Հատկապես ընդգծվել է, որ ներկայումս նկատվում է Եգիպտոս այցելող զբոսաշրջիկների հոսքի աճ և երկրի նկատմամբ պահանջարկի բարձր մակարդակ։
Նշվում է, որ որոշումը միտված է զբոսաշրջության կառավարման համակարգի զարգացմանն ու այցելուներին մատուցվող ծառայությունների որակի բարելավմանը, ինչը կնպաստի Եգիպտոսի զբոսաշրջային ուղղության մրցունակության բարձրացմանը թե՛ տարածաշրջանային, թե՛ միջազգային մակարդակներում՝ համընթաց ներգնա զբոսաշրջության աճող միտումներին։
