Իրանը շարունակում է ձևավորել իր դիրքորոշումը ԱՄՆ-ի հետ առաջիկա բանակցությունների նախաշեմին, որոնք վերաբերում են Իսլամական Հանրապետության միջուկային ծրագրին։ Այս մասին Tasnim գործակալությանը հայտնել է Իրանի ԱԳՆ պաշտոնական ներկայացուցիչ Իսմայիլ Բաղաին։
Նրա խոսքով՝ Թեհրանի մոտեցումը թե՛ պատժամիջոցների դադարեցման, թե՛ միջուկային բանակցությունների հարցում հստակ է, ինչպես նաև հայտնի է Վաշինգտոնի դիրքորոշումը։ Բաղաին նշել է, որ ցանկացած բանակցային գործընթաց ենթադրում է համատեղ աշխատանք, և Իրանը ներկայումս գտնվում է իր դիրքորոշման վերջնական ձևավորման փուլում՝ ակնկալելով հաջորդ փուլն անցկացնել առաջիկա երկու-երեք օրերի ընթացքում։
ԱԳՆ ներկայացուցիչը միաժամանակ ընդգծել է, որ միակողմանի զիջումների պարտադրումն ուղղված բանակցությունները չեն կարող արդյունք տալ։ Նրա խոսքով՝ Իրանը վճռական է շարունակել դիվանագիտական ուղին և պաշտպանել իր տեսակետի իրավաչափությունը։
Բաղաին նաև նշել է, որ կարևոր է, որպեսզի բանակցային մյուս կողմը արձանագրի Իրանի միջուկային ծրագրի խաղաղ բնույթը՝ հավելելով, որ մինչ այժմ ծրագրից շեղումներ չեն արձանագրվել։
