Փետրվարի 21-ին Հայաստանի ազգային պատկերասրահում կայացավ «Վարդանանց» բժշկական կենտրոնի հեղինակած «Բուժում է Վարդանանցը» գրքի եռահատոր ժողովածուի հանդիսավոր շնորհանդեսը։ Այն ներառում է 371 բուժման գործելակարգ, որոնք ներկայացնում են տարածված հիվանդությունների ախտորոշման և բուժման ժամանակակից մոտեցումները՝ հիմնված ապացուցողական բժշկության վրա։
«Վարդանանց» ՆԲԿ-ի գլխավոր տնօրեն Լևոն Ալթունյանն իր խոսքում նշեց, որ «Վարդանանց»-ի ծառայություններից օգտվում է ընդհանուր առմամբ մոտ 150․000 բնակչություն։ Նա ընդգծեց, որ այս ծավալը կենտրոնի գործունեությունը տեղափոխում է հանրային առողջապահության տիրույթ, որի հիմնական գերխնդիրներից է պացիենտների համար ապահովել ոչ միայն բժշկական օգնության հասանելիություն, այլև բարձր որակ։
Անդրադառնալով «Բուժում է Վարդանանցը» ժողովածուի նշանակությանը՝ Լևոն Ալթունյանը նշեց, որ թեև այն հիմնականում նախատեսված է բուժող բժիշկների համար, դրա արժեքը զգացվում է նաև ավելի լայն համատեքստում։ «Այսօր շատ բուժառուներ բժշկի են դիմում՝ արդեն իսկ խորհրդակցած արհեստական բանականության հետ։ Այս պայմաններում առանձնահատուկ կարևոր է, որ բժիշկը խոսի նույն մասնագիտական լեզվով։ Դա ձևավորում է վստահություն, իսկ վստահությունը՝ պացիենտի ներգրավվածություն բուժման գործընթացում, ինչը բուժման հաջողության ամենակարևոր բաղադրիչներից է»,- ասաց Լևոն Ալթունյանը։
«Վարդանանց» ՆԲԿ-ի Մասնագիտական գերազանցության կենտրոնի տնօրեն, գրքի խմբագրական խորհրդի ղեկավար Հարություն Մանգոյանը նշեց, որ ժողովածուն ներառում է հիվանդությունների կլինիկական պատմություններ և դրանց բուժմանն ուղղված ուսումնասիրություններ. «Այո՛, խոսքը հիմնականում ամենատարածված հիվանդությունների մասին է։ Այն կոչվում է ժողովածու, որովհետև այնտեղ այբբենական կարգով ներկայացված են գրեթե բոլոր հիվանդությունները՝ վարակային, նյարդաբանական, սրտաբանական, հոդաբանական և այլն»։
Հ․ Մանգոյանը շեշտադրեց հեղինակային մոտեցման կարևորությունը. «Սա ոչ թե պարզապես նյութ է, այլ Վարդանանցի բժիշկների հեղինակած աշխատանքը, և այստեղ երևում է Վարդանանցի ձեռագիրը։ Բուժում է Վարդանանցը ձևակերպմամբ մենք ուզում ենք ցույց տալ մեր ձեռագիրը. առաջինը՝ այո՛, մենք բուժում ենք, և երկրորդը՝ այո՛, սա մեր ձեռագիրն է, և ուրախ ենք, որ կարող ենք կիսվել այդ ձեռագրով»։
ՀՀ ԱՆ ընտանեկան բժշկության գծով խորհրդատու Սամվել Հայրումյանը նշեց. «Որպես ընտանեկան բժիշկ՝ խորհուրդ կտամ այս գիրքն ունենալ որպես սեղանի գիրք, քանի որ նման միասնական ձեռնարկ առայսօր բացակայում էր։ «Վարդանանց» բժշկական կենտրոնի նախաձեռնությամբ այդ բացը լրացվել է ։ Գիրքն օգնում է հստակ կողմնորոշվել՝ որ դեպքերում ընտանեկան բժիշկը կարող է ինքնուրույն կազմակերպել պացիենտի բուժումը, իսկ որ դեպքերում՝ ուղղորդել նեղ մասնագետի։ Ներկայացված բուժման մոտեցումները հիմնված են ապացուցողական բժշկության վրա և նպատակ ունեն բացառելու ավելորդ դեղերի նշանակումը»։
