FlyOne Armenia ավիաընկերությունը համալրեց իր նավատորմը ևս մեկ Airbus A320 տիպի օդանավով՝ շարունակելով ռազմավարական զարգացումն ու Հայաստանի ավիացիոն շուկայում դիրքերի ամրապնդումը։
Ընկերությունը հայտարարվել էր ավիացիոն ոլորտում շուրջ 70 միլիոն ԱՄՆ դոլարի ներդրման մասին, և այս օդանավը նշված ներդրումային ծրագրի առաջին մատակարարումն է։ Եվս երկու օդանավ նախատեսվում է ստանալ առաջիկա օրերին։
Այս կարևոր ձեռքբերման կապակցությամբ Երևանի «Զվարթնոց» միջազգային օդանավակայանում տեղի ունեցավ Airbus A320 օդանավի դիմավորման խորհրդանշական արարողությունը, որին ներկա էին ավիաընկերության ղեկավար անձնակազմը և գործընկերները։ Ներկաները ծանոթացան ընկերության վերջին ձեռքբերումներին, հնարավորություն ունեցան շրջել սրահում, լինել օդաչուական խցիկում, ուսումնասիրել օդանավի տեխնիկական հնարավորությունները։
Նշանավորելով ավիաընկերության նոր ձեռքբերումը՝ դիմավորման արարողության ընթացքում FlyOne Armenia-ի գլխավոր տնօրեն Արամ Խաչատրյանը նշեց․ «Նավատորմի համալրումը ևս մեկ կարևոր քայլ է մեր ռազմավարության իրականացման ճանապարհին։ 2026 թվականին FlyOne Armenia-ն իրականացրել է ևս 50 միլիոն ԱՄՆ դոլարի ներդրում՝ նավատորմի թարմացման և ընկերության գործառնական ռեսուրսների ընդլայնման նպատակով։ Այս ներդրումով ևս երկու ինքնաթիռ 2026 թվականի ընթացքում կհամալրեն նավատորմը: Մեր նպատակն է շարունակաբար ամրապնդել Հայաստանի ավիացիոն անկախությունը, ապահովել շուկայում առողջ մրցակցություն և գների կայունություն ուղևորների համար։ Մեր հաջողության հիմքում աշխատանքի նկատմամբ նվիրումն է, հայրենիքի նկատմամբ սերը և Հայաստանի տնտեսության հանդեպ պատասխանատվությունը»։
2026 թվականին FlyOne Armenia-ի սեփական օդանավերի թիվը կհասնի 10-ի, իսկ ընդհանուր շահագործվող օդանավերի թիվը՝ 13-ի։
Նավատորմի ընդլայնումը կնպաստի Հայաստանի Հանրապետության տնտեսական զարգացմանը, զբոսաշրջության աճին ու աշխատաշուկայի ընդլայնմանը։ Նոր օդանավերի շահագործման արդյունքում նախատեսվում է ստեղծել շուրջ 300 նոր աշխատատեղ։
Արդեն բացվել են նոր թռիչքային ուղղություններ․ 2026 թվականի ապրիլից՝ Ամստերդամ, Վիեննա, Սամարա, մայիսից՝ Կազան, հունիսից՝ Ալիկանտե։ Ընկերությունը շարունակելու է ակտիվ քաղաքականությունը՝ ապահովելով հասանելի ճամփորդություն՝ բարձրորակ ծառայությունով։
